2008年4月29日(星期二) - 陽光普照, 天氣炎熱
今日一早起身就去浸溫泉, 真系好舒服, 夜晚同早上系完全唔同感覺. 當浸完溫泉之後, 就要開始系呢個旅程我最期待既一日-阿蘇火口之旅. 我地尋日已經同屋主講左, 請佢地開車載我地出去JR站, 佢地好好咁一口答應.
去到JR站之後, 我地選擇唔搭JR去阿蘇, 而搭JR既巴士-阿蘇由布高原巴士あそゆふ高原バス1号. 呢架巴士想系呢度作一個小小既簡介. (詳細既可以睇下阿蘇特別篇 - 交通), 系計畫呢個九州之旅初期, 因為買左JR Pass, 所以想儘量搭JR去每個地方, 但因為JR既班次實在太疏, 時間又太難就. 後來系其他既blog見到有人搭九州橫斷觀光巴士去阿蘇連lunch 4,450yen, 呢架巴士本身系由別府開出, 熊本為終點站, 途經由布院, 阿蘇, 草千里等…仲會送到你去火山口, 可以節省搭纜車上去火山口既車資. 但系只可以經電話預訂, 唔可以系網上預訂, 而啱啱又系日本既黃金周, 擔心會無位, 所以唯有搵個識日文既朋友幫手打電話去預訂. 但係出發前幾日, 又見到另一個blog介紹一架JR巴士阿蘇由布高原巴士, 同樣巴士系由別府開出, 途經由布院, 黑川溫泉, 阿蘇或者草千里, 視乎阿蘇火山開唔開放, 如果阿蘇火山已關閉, 那就會轉去草千里, 之後再返回黑川溫泉和別府, 但去到阿蘇火山, 要自己搭纜車上火山口, 本身JR pass應該系唔包呢架巴士, 但系睇過有d blog話系由布院可以用JR pass換阿蘇由布高原巴士卷, 咁我地唯有試下la, 當第一日去到博多時, 曾經去JR counter問過, 但系佢地話要俾錢, 但我地去到別府時, 再去JR counter問, 佢地居然俾我地免費換巴士卷, 實在太好la, 所以我地去到由布院時, 首先我地取消之前已經預訂既九州橫斷巴士, 因為日本人十分重視守信, 所以點都好, 我地都要同佢地取消預訂.
阿蘇由布高原巴士
巴士站
阿蘇由布高原巴士站就系由布院JR站前面, 當架紅噹噹既巴士黎到時, 我地上車先發覺原來成間車只系得我地兩個乘客, 真系估佢唔到呀... 車上仲有一名票務員小姐, 當巴士駛離由布院時, 佢知道我地唔系日本人, 就問我地系咩野地方黎, 我地話香港, 佢就系度左搵右搵, 原來佢拎左本簿出黎, 佢系本簿上寫字或者畫公仔話俾我地知而家去到邊度, 同埋幾座山叫咩名, 當然佢仍然全程不停咁講日文. 離開由布院之後, 第一個景點系朝日台, 我諗黎呢度既目的系俾我地系度落車抖下或者去洗手間, 因為佢話只得15分鐘時問, 之後去左黑川溫泉既優彩旅館, 但系今次無得落車, 應該只系一個上客站, 今次有大約五六個人上車, 應該全部都系日本人. 巴士再次開行, 票務員小姐問我們要唔要加500yen預訂今日既午餐, 之後票務員小姐開始介紹沿途既風景, 當然系用日文, 所以我地完全唔知講咩... 下一個目的地系くじゅう花公園, 我地系阿蘇由布高原巴士既乘客, 所以可以有團體票價錢入場500yen, 如果系12月1日至3月31日期間, 巴士系會去九重夢大橋, 其他時間就會去くじゅう花公園, 這花公園種滿不同顏色既花, 好多攝影愛好者都黎花公園影相. 當影完相之後, 就出發去阿蘇, 首先會經過阿蘇JR站, 之後就直接去阿蘇西站, 系呢段路途中, 票務員小姐開始派發我地既午餐,原來系一個巨形既甜腐皮飯再加一些雜菜, 唔… 可能我本身唔鍾意食甜腐皮飯, 味道認真麻麻…但係我地隔離既日本人, 居然成盒便當食晒...去到阿蘇西站, 票務員小姐就帶我地去纜車購票處, 原來只要我地俾阿蘇由布高原巴士既貼紙俾購票員看, 就會有折扣740yen. 買完票之後, 就搭纜車上去火山.
花公園
阿蘇站前
呢個就係我地既午餐
我一直都好擔心火山口唔知開唔開, 因為阿蘇火山仍然系一個活火山, 不時都會釋放毒氣, 當有大量毒氣時, 火山口就會關閉, 或者局部關閉. 可以上網查阿蘇火山既情況, 但系火山每一刻都會轉變, 所以都好難講. 今次好好彩, 可以上到去火山口, 雖然唔系全部開曬, 但都可以好近距離見到火山口. 我地見到火山口, 不禁咁”嘩!”左一聲, 好壯觀呀!! 系我地影影下相期間, 突然有廣播, 都系講日文完全聽唔明, 估計佢系話有毒氣, 叫我地快d返去纜車站位置, 我地諗住影多幾張相就走, 點知已經嗅到好大陣既硫磺味, 好哫喉, 我地都儘快放離開火山口. 之後我地諗住仲有時間, 去左另一邊遼望台, 點知我地返去車站時, 剛剛走了一班車, 但下一班車要等15分鐘, O…我地未必趕得切系預定既時間返去巴士, 之前票務員小姐已經同我地講明, 我地遲到的話, 佢地系會開車走, 唔會等我地. 我地一路都好擔心, 因為我地既行李全部都系巴士上, 如果巴士走左都唔知點算呀…當我地去到巴士站, 太好啦, 票務員小姐仲度等我地, 真系有驚無險呀…
阿蘇火山
火山避難處
阿蘇火山
d人開始疏散
巴士首先會返去阿蘇站, 沿途會經過草千里, 因為我地已經去左阿蘇火山, 所以唔會係草千里逗留. 但都可以係巴士上影下草千里, 同樣巴士都會經過米塚, 係一個圓錐形小草山丘, 好似一個倒轉既碗咁, 之後我地就係阿蘇站落車, 轉乘JR去熊本.
草千里
米塚
熊本市電
熊本城
去到熊本大約4點半左右, 我地諗住5點左右可以去到熊本城, 因為熊本城在6:00pm關門. 所以我地好趕咁, 去到新水前寺站落車, 再轉市電去酒店, 熊本市電都好容易搭, 只要認清方向就可以. 同樣跟酒店既服務員講我地只系放低行李, 之後先返黎check-in, 初時佢都聽唔明, 後來有另一個服務員, 應該英文會好d, 佢知道我地想點, 就幫我地安頓左d行李. 之後我地一枝箭咁衝去熊本城, 間酒店都好近熊本城, 所以我地好快就到達, 原來今年系熊本城400周年, 所以周圍都好多人. 熊本城大過小倉城都幾多, 我地都未行晒就已經要走la, 因為6點要關門. 參觀完之後, 我地返酒店check-in先, 再出去搵野食. 我地就根據本旅遊書介紹去一間食拉麵既餐廳, 唔…味道都一般, 可能食得太多拉麵, 唔系咁想再食la. 食完野之後, 就行下呢條熊本最出名既商店街. 但係好多商店都關左門.....唉...算la, 今日都好累, 早d返去酒店休息lu.
阿蘇 - 阿蘇町觀光協會
熊本 - 熊本市觀光介紹所, 熊本國際聯合協會
沒有留言:
發佈留言