案發日期: 2008年6月26日
一直都想做返運動, 一來又可以減下肥 (鬼叫有人話我都有d肉bor.... ), 二來又可以郁動下個人會精神d. 但係始終無的起心肝去實行. 之前曾經同朋友講過不如去做yoga, 大家都十分雀躍, 話要上網搵資料睇下去邊度做yoga好, 但係...hehe...之前一直都好似好忙咁, 公司又忙, 又要籌備去日本九州之旅等等....其實都係怪自己太懶, 朋友們已經不停咁問落實做yoga時既時間表... 終於係去完旅行之後, 自己上網搵下資料la, 其實而家外面好多地方都有得玩yoga, 咁多間都唔知邊間好, 我唯有鎖定其中幾間, 詢問一下朋友喜歡邊間, 其中有d可以俾你免費試玩一堂, 咁都諗住先去試玩幾間, 再比較一下. 如果想試玩, 就要系網上登記, 再等佢打電話俾我.
唔....一開始我登記左Myoga, 但系登記左幾日都無人打電話黎, 咁再登記另一間Yoga Yoga, 呢間好快就覆電話俾我. 咁就約左時間去試玩一堂. 佢地會係電話已經問你好多野, 例如: 點解你想玩yoga, 目的係咩, 想玩邊類既yoga....其實我都未玩, 點知玩邊類型....咁其實都係求是答左幾句就算la. 但係佢地好似好想你地快d上去咁, 我話約下個星期, 佢地就問點解唔今個星期, 唔....實在太多問題la....
去到試玩果日, Yoga Yoga既人話7點有堂, 叫我地6點半去到, 但係未到6點半已經打電話黎吹我地, 叫我地快D去到. 唔....都好"唓", 去到Yoga Yoga時, 佢地已經係企係門口等我地. 佢地話6:45pm有一班, 所以同我地講左幾句, 就叫我地快d去換衫上堂先. 我地今次係上Yoga Therapy, 係一個印度人教. 都教得幾好, 同埋佢間房係對住維港, 成個feel都好好...
咁個sales等我地沖完涼, 換好晒衫之後, 又企係門口等我地. 一開始佢介紹呢間yoga中心既導師係好出名同好巴閉等等, 又話佢地都係啱啱開業, 所以唔會有好多人係度唔會好迫, 又問我地覺得點, 環境ok唔ok等等, 諗住會唔會keep住做呀. 其實我心諗佢不如直接話俾我地知要幾多錢la. 跟住我地問佢咁佢地既月費係點計, 首先佢地有幾個plan, 最平果個plan係$688 1個月8堂, 同埋$988 1個月無限次, 仲要簽一年合約, wa...都好貴...咁我地問佢仲有無平d, 佢話無la, 因為個價錢唔可以太平要控制返d人流wor....咁我地話太貴la, 咁算la...跟住佢又話咁呀...就計返一個平d既plan俾我地, $5xx 1個月5堂(唔記得左實際金額), 唔...我地問佢有無得平d, 佢話無la, 最平la...可能佢見我地無咩心想join咁, 佢就叫我地等等, 話要問下同事, 間左一陣, 佢叫左另一個人黎, 如果用恒生咭可以做到$453 1個月5堂, 但就要簽2年, o...2年太耐la, 唔會la... 佢地講講下又話又有另一個plan, 我地2個人join $453既plan, 就一人一年, 哈....其實真係任佢地講....但我個fd就話佢想要多d堂, 唔想得5堂咁少, 佢就話仲有另一個plan $588 1個月10堂, 同樣都係簽一年合約, haha....呢個plan都真係幾抵ge...但係我地都係想試下其他先, 所以話要諗諗...跟住....佢地就不停咁問"仲要諗咩野呀?" 而家好平ga la等等, 咁我唯有講我仲有野做要走la, 等我返去諗下先la (其實我係好肚餓就真), 佢地就話一係而家簽左先la, 好快ga...我都費時理佢呀....都係走左先la...
幾經辛苦, 終於離開左呢間Yoga Yoga, 佢地真係都好"唓"呀. 第二日佢就打電話黎, 問諗成點呀, 我話未諗掂bor, 佢話不如我今日去佢度簽約先, 當然唔會la, 佢真係當我傻ga. 其實我都覺得佢地最後個plan $588 10堂係好抵下, 因為佢地除左yoga, 仲有跳舞堂上, 都幾多元化, 但係我自己知自己事, 我唔會咁勤力一個月去到10堂, 我諗我只係一個星期去1堂, 同埋都唔知會唔會可以keep到一年都咁做tim....所以....真係要諗諗....
其實到最後得出既結論係: 佢地一開始會俾d貴plan你, 只要你再同佢傾下, 佢會慢慢俾d平少少既plan, 再要同佢傾下先得, 其實有d似街市買菜咁講價....
haha...等我下一次再去試另一間先....
沒有留言:
發佈留言