2008九州火山之旅 - Day 7 青島 -> 宮崎 -> 夜行特急返博多

2008年5月1日 (星期四)- 橫風橫雨
尋晚黎到間酒店既時候, 已經好夜la, 咩都睇唔到, 所以今朝早想系酒店附近四圍睇下, 呢間青島パームビーチホテル系青島好出名既渡假飯店, 鄰接青島海水浴場, 景色都好靚. 行完間酒店之後, 仲可以順便行去隔離既子供之國, 而家仲系花祭tim, 所以會好靚ga.

我地原先諗住今朝一早再浸多一次溫泉, 點知起唔到身, 算la… 咁就落去食早餐la, 酒店既早餐都幾豐富, 不過都係別府間酒店既早餐好味d. 但系去到食早餐時, 晴天霹靂...出面落好大雨呀, 仲好大風tim…唉….今日仲安排左好多行程ga…都無辦法la….唯有出左去睇下點la, 我地系酒店check-out之後, 就順便換返張巴士無料一日券, 只要出示passport就可以換到, 咁岩呢間酒店既receiption都可以換, 跟住我地寄放行李系酒店, 就出去四周行下.

呢個就係我地既早餐la

真係晴天霹靂

巴士無料一日券

首先我地系酒店入面同附近行下先, 橫風橫雨….有遮等如無遮….如果無落雨, 呢度環境應該幾靚ga. 再行去子供之國, 呢段時間系花祭, 入場系要俾錢, 平時就唔駛入場費, 但因為我地住係青島呢間酒店, 佢會每人送一張子供之國入場券, 不過, 今日落咁大雨, 都無咩用, 所有機動遊戲都停開, 又無得玩摩天輪....成個子供之國都無咩人, 我地系一間餐廳避緊雨時, 見到有幾只好大既鴨仔一齊避雨, 好攪笑, 唔知呢幾隻鴨仔系邊度黎. 係我地避雨期間, 有一檔路邊檔既檔主問我地系邊度黎, 我地話香港, 佢地都好好咁, 其中有一個女仔英文幾好ga, 咁我地就問佢地, 去堀[切峠同埋日南海岸點樣搭巴士去, 但系佢地話都唔系好清楚, 可能日本人唔系經常搭巴士, 同埋原來個女仔佢以前係意大利住, 都係返左日本幾年, 所以都唔係好清楚四周既路. 咁我地同佢地道別左之後, 當然仍然落緊雨, 不過細雨左好多, 我地就係附近影下相, 相信平時陽光普照, 都應該會幾靚. 不過始終落雨同埋都幾大風, 真係好難再影落去, 唯有離開子供之國, 我地沿另一條路返酒店, 先發覺我地去返子供之國既入口, 原來頭先我地係無經過個子供之國既入口, 但係又無人叫我地拎入場券....真係奇怪la.

呢個就係係子供之國入面點橫風橫雨la

初時諗住由酒店附近沿住沙灘行去青島神社, 我諗大約行廿分鐘左右, 可以順便欣賞附近境色, 但實左太大風la, 跟本就好難行去, 我地係酒店睇左巴士時間表, 知道差唔多時間有巴士會經過酒店, 所以最後我地決定搭巴士過去青島神社, 其實可以搭JR過去, 但係又要行返去JR, 巴士站只不過係酒店門口, 而且又唔知JR既時間, 費時去到JR時, 又唔知要等幾耐. 搭巴士都只不過搭一個站, 我地係落車時出示無料巴士一日券就可. 我地落車既地點, 原來都好近青島神社, 應該搭巴士方便過搭JR, 因為JR都離青島神社有D遠. 我地諗住去左附近食野先, 因為之前係新假期裡面, 見到介紹一間食店港あおしま食堂, 好似好好味, 同埋好抵, 大約$100平食十色海鮮丼, 查過地圖, 應該係青島附近, 但係佢地既營業時間只係11am-2:30pm, 所以我地要去左食野先, 係巴士站附近, 有一間宫崎觀光社, 嘩! 佢係好細好細間ga, 我地諗住問下佢入邊既職員知唔知呢間食店係邊, 但係...佢又唔知我地講咩, 我地又唔知佢講咩...真係...咁佢都好好咁幫我地睇地圖, 大約指左話係邊個方向la, 咁我地唯有跟住個方向行, 沿途都好大風大雨, 我地已經成身濕晒la, 仲要我本身係熊本新買左把遮, 都要經壯烈犧牲左la. 我地行左都好似好耐咁, 沿途都問左幾間商店既人, 知唔知呢間食店係邊, 中間都有諗過不如算la, 咁大風大雨, 又唔知係邊...但係唔去果間食店, 附近好似又無咩食, 同埋新假期介紹時, 真係好似好吸引咁, 所以我地都係繼續搵, 終於係一間商店既人問到間食店係附近, 佢地教左我地點樣去, 我地終於幾經辛苦去到la, 呢間食店真係唔講唔覺係一間食店, 我諗都只係日本人先知. 因為呢間食堂本來係俾碼頭工人每日係度開餐, 我地入到去食店, 都唔少人係度食野, 估唔到落雨都咁多人, 平時陽光普照時, 應該會非常多人. 我地分別叫左十色刺生飯同海鮮定食, 我地見到野食時都好嘩然, 真係幾大份呀, 同埋d刺生又新鮮, 總之好好好好味la, 雖然頭先搵呢間食店搵得好辛苦, 仲成身濕晒, 但都係值得ga. 係我地離開食店時, 見到佢地都有將新假期介紹佢地既報導都放左出黎呀. 不過應該好少香港人會去呢間食店, 都無旅遊書介紹過呢間. 呢間食店係日本應該都幾出名, 我地見到好多日本本地既旅行團車d日本人黎呢度食, 可能因為供應既海鮮定食又平又新鮮又大份.

海鮮定食

十色刺生飯

食飯之後, 就要出發去青島神社, 真係好唔捨得離開食店, 出面落咁大雨...我地今次行得快好多就到達頭先我地落車既巴士站, 其實都唔係好遠. 青島神社係一個小小既島仔上, 好得意, 成個島仔都俾"鬼的洗衣板"圍住, "鬼的洗衣板"係因為交互堆積的砂岩和泥岩在傾倒後被波浪侵蝕造成. 但因為佢係一個島仔上面, 中間有一條彌生橋連接, 但實在太大風, 行條橋時都行得好辛苦呀. 我都好怕會俾佢吹落海呀. 我地行左入去青島神社參觀, 其實都唔係有咩太大既特別, 同其他神社差唔多. 行左一陣之後, 我地就離開青島神社, 我地見好似無咁大風, 就圍個島仔行左一個圈, 其實風景都幾靚, 周圍都種左好多不同既樹木.

果日係青島既天氣真係好差ga

鬼的洗衣板

青島神社

行返出去巴士站途中, 經過縣立青島亞熱帶植物園, 本身都想入去睇下, 但又落雨, 算la. 本身今日既行程仲會去堀切峠, 同埋睇下有無時間去埋Sun Messes日南, 但係咁既情況, 我地都係放棄左, 我地搭巴士返酒店算la. 我地返到酒店之後, 因為我地成身濕晒, 所以同酒店既人講想拎返d行李換衫先, 換完衫之後放返d行李係佢地果度. 由於今晚我地會搭夜行特急返博多, 所以今晚無得沖涼, 所以我地就走去浸多一次溫泉, 雖然我地唔知得唔得, 但我地真係無辦法之下試下, 又ok bor, 我地浸完溫泉之後舒服晒, 就要準備起行出去食晚飯la, 我地係酒店拎返d行李之後, 就出去搭巴士去宮崎, 期間酒店有個女職員好好咁, 問我地係咪去子供之國JR站話車埋我地, 我地話唔駛la, 因為我地要去宮崎JR站. 咁我地搭巴士去到宮崎站之後, 發覺宮崎站好大, 早知尋晚係宮崎站轉車, 就唔駛食杯麵.
我地諗住去宮崎附近既JUSCO行下順便食野. 有一架巴士係往返JUSCO同宮崎站, 都可以用無料巴士一日券, 但唔知點解我地落車時, 巴士司機話要撕我地既巴士券既一部份走, 但係我地怕之後回程無得用, 同佢講我地仲要用巴士券返宮崎JR站, 但又係大家都唔知大家講咩, 最後巴士司機都係堅持撕左我地既巴士券既一部份走. 我地係JUSCO裡面行下, 同埋係入面food court度食野. 不過我覺得都係無咩野行. 到差唔多時間, 我地搭巴士返宮崎站, 我地一直都怕巴士司機會唔會唔俾我地用無料巴士券, 但呢個巴士司機今次無咩特別問題, 就俾我地落車. 之後我地就搭夜行特急返博多.

參考資料:
宮崎市觀光協會