第二日一早起身, 又要準備今日行程la, 係酒店食完早餐之後, 就出發去海ノ中道海濱公園, 我地係博多站乘搭9:07am既JR去海ノ中道站 車程33分鐘450yen (因為我地係由第三日先開始用JR pass, 所以今日既JR係要俾錢), 呢個行程係因為睇左新假期裡介紹呢個海濱公園, 好似好靚咁, 所以突然加插, 呢個係全日本最大型既海濱公園, 春夏秋冬各有主題性的花祭. 園內更設有單車徑及提供租單車服務, 仲有動物園. 我地去到時, 首先租返架單車先, 因為呢個海濱公園真係好大, 唔租單車係無可能行到ga (公園入場費400yen, 租單車3小時410yen). 但係其實公園都係一般, 好唔好玩真係見人見智.
我地就係搭呢架JR去海ノ中道
海ノ中道門口
海ノ中道裡面種左好多粉彩色既花卉, 仲有摩天輪同埋機動遊戲
海ノ中道的動物園, 但係我唔知呢隻係咩動物
當離開公園時, 因為搭JR只係去到博多站, 仲要轉車去天神, 所以諗住搭巴士返天神, 但巴士仲有成半個鐘先到, 唯有周圍行下, Marine World 水族館係海ノ中道海濱公園附近, 但因為只得好少時間, 所以無入去參觀. 但係沿途都好似好多人入去水族館, 應該都幾好玩咁...
海ノ中道的JR站
Marine World 水族館
搭巴士去到天神郵便局落車之後, 當然去食野先, 諗住跟住本旅遊書介紹去食日本火鍋, 點知去到先知原來只係開夜晚, 唯有再搵過第二間餐廳la, 都無咩心水, 是旦入一間餐廳食la, 但係因為間餐廳只係得掛係牆既餐牌, 又無相, 只係得日文, 真係唔知咩黎, 唯有睇下其他人食咩, 個老板娘知道我地係中國人之後, 即刻拎本書出黎, 原來係本日本對中文既會話書, 哈! 因為呢個旅行, 我都買左一本日文旅遊會話書, 我地將2本書係度比對, 再加身體語言, 終於成功落單叫野食, 原來呢間餐廳主要係食炸物, 炸豚肉, 炸魚等等, 都好好味呀!!
炸魚定食
炸豚肉定食
食完野緊係行下街la, 天神係褔崗甚至係九州最大的繁華街, 有商業大廈, 百貨公司, 仲有相連地鐵既天神地下街, 不過個人黎講....好似唔係好啱行, 唔....講潮流服飾, 同香港差唔多, 甚至有d差過香港, 價錢都唔係平過香港, 可能我啱啱去既時候, yen升到好高, 所以都無咩點買到野, 不過有樣野應該係抵買, 就係波鞋, 基本上款新過香港, 同價錢平過香港.
本身諗住食埋晚餐先返酒店, 點知實在太累la, 搭100yen巴士返左酒店休息先. 休息完之後, 就去中洲搵野食, 初時諗住試下中洲好出名既屋台, 即係好似香港既大排檔, 但之前係好多travel blog裡面都對屋台既野食評價一般, 所以都係影下相算la, 我地就入左係屋台附近的一間餐廳食飯, 當然都好好味la...應該日本都無咩唔好味ga la...
食住野之後, 就係附近行下, 中洲係博多既紅燈區, 周圍都係夜店, 但好奇怪, 係夜店附近, 好多商鋪都已經關左門, 但係仲有好多花店係仲開緊, 唔知係咪去夜店既男士要係呢d花店買花送俾夜店裡面既小姐呢? 同埋見到d夜店門口, 會有一大班女仔企係度, 好似係歡送d客人咁, 好得意...
完結左第二日既旅程, 返到酒店休息, 唉呀...真係好累呀...只係第二日, 已經累成咁...之後.......
沒有留言:
發佈留言