終於有個瓦遮頭啦~~

近排日搵夜搵, 日日搵, 不停搵將軍澳, 觀塘等既租盤, 由於我同bf都各自有大家既要求, 又加上d租金升到一個非常唔合理既價錢, 同埋事實上租盤唔係好多, 所以想搵一個符合我地要求既租盤真係好難.

其 實之前去過藍田同將軍澳既居屋睇過, 前者係又細間又殘舊, 而後者就好細間又貴. 跟住就去左觀塘月華街果d睇, 我細細個覺得果度係高尚住宅居黎ga, 不過都好多年前, 而家因為觀塘裕民坊一帶要重建, 好多裕民坊既樓都已吉晒. 而且月華街感覺有D自成一角呢. 但原來由MTR行上去月華街, 條樓梯都幾係野, 附近又無超級市場, 如果由APM買完野拎住D野行上去都幾大鑊. 其實月華街大部份都有露台, 呢點我幾喜歡, 但係好多都幾殘, 除非係有裝修, 但有裝修既都要過萬蚊, 又好似唔係好抵.... 而且bf成日話覺得觀塘D空氣唔好(其實我無咩感覺), 佢唔係咁喜歡, 所以都係得個睇字. 後來係觀塘協和街睇左個單位, 本身都OK, 但係最大問題佢個洗手間, 我睇到時以為點解無沖涼位, 後來睇真D先見到花灑係馬桶上面, 佢個洗手間同係商場既洗手間的一間廁間差不多大, 真係估佢唔到, 個業主仲話其實你都唔係成日係洗手間, 所以呢個都唔係一個問題GE, 但我地真係接受唔到....唉....真係估佢唔到呢...

前 幾日我地又出動去睇樓, 今次去睇油塘中心, 油塘中心係第一期居屋, 所以可以想像到佢係比較殘舊, 我本身都唔抱咩野期望, 加上我有朋友以前係住油塘中心, 所以我大約知道油塘中心係點. Agent帶我地上去睇時, 都話間房有D殘, 去到睇時呢度比我想像中大, 差不多8成多實用率, 但都真係頗殘, 地板係油木地板, 但有部份地板已經起左, 所以都真係唔多掂. 點知Agent話業主會重新鋪過D鏄石板, 咦? 咁又唔同講法bor, 咁我就問Agent會唔會油埋牆呢, Agent話可以問下業主, 唔...都ok bor, 雖然都預左業主唔會豪裝果D, 但如果重新鋪過地板同油牆, 個感覺會即時唔同左. 其實呢度租金又唔算太貴, 起碼唔係過萬先... 都可以考慮一下.

果 晚睇完後, 我地同Agent話要諗一晚, 第二日先覆佢. BF就諗住一係睇下可唔可以再傾平D同埋油埋牆身, 如果真係可以平D, 就即刻租, 如果唔係就再睇下點先. 其實BF希望可以遲D先租, 可能等到11月或者12月頭先租, 因為每早一個月租, 要俾多一個租, 而家D租太貴, bf覺得好唔抵, 甚至如果租到一間包全屋傢電就仲好, 唔駛再買傢電, 一搬入去就住得. 所以BF就同Agent講, 睇下可唔可以平D. 點知又好順攤, 業主又願意平D同埋油牆. 咁又好順理成章就決定租呢間啦. 仲即晚去簽約tim.

而家等業主裝修完, 大約10月初可以收到樓. 總算終於有個瓦遮頭啦~~ 之後要諗下買埋傢俬啦....

油塘中心圖則