講 講下又話咁快今個星期日要過大禮, 由於未來99話唔駛要椰子等呢D野, 所以大部份都以利是代替算啦. 但係始終有d野一定會買ge, 例如潮州嫁女餅, 因為我屋企係潮州人, 已經講明要潮州餅, 唔要唐餅. 咁買潮州餅, 當然要去貴嶼和記隆買, 係最正宗. 因為之前去左日本, 所以都唔係好得閒去攪呢d野, 今日終於有時間打去問下, 本身諗住會買埋回茶禮的大發, 紅飽, 煎堆同埋鬆糕, 點知貴嶼和記隆話呢D要訂ga, 而且要早5日先訂, 佢話我趕唔切, 咁算啦, 呢個最多都係用利是代替算啦. 而佢他果d潮州餅同埋龍鳳餅就有現貨ge. 唔駛訂, 咁呢幾日搵日放左工去九龍城買先得.
另外我仲諗住買茶葉, 因為我屋企係好鍾意飲鐵觀音, 所以決定買2盒鐵觀音過大禮, 上網搵左d資料, 知道上環褔建茶行既鐵觀音又平又靚, 所以今晚專登去左買2盒鐵觀音茶葉, 但其實我都唔知係咪真係好飲, 等過左大禮之後, 沖黎飲下係咪真係咁香, 如果係好飲, 之後可以繼續去呢度買呢.
今日啱啱買既鐵觀音呢
而 過大禮既禮金盒, 包羅萬有利是封, 囍字利是封, 龍鳳鐲, 對聯等, 全部都已經係之前淘寶淘返黎. 不過果時淘呢D物品時, 因為順便買埋上頭套裝, 點知送到黎時其中一份上頭套裝既紅鏡裂左, 我媽即時話大吉利是咩, 不過呢個似乎係運輸過程既問題, 又唔關賣家事ge, 後尾我同賣家講有塊鏡裂左, 賣家好好咁補寄返俾我.
塊鏡仲要咁裂法, 一定唔用得
準備過大禮既清單: -
男家過大禮女家物品
| 禮金封 | 1 封 |
| 龍鳳餅 | 2 對 |
| 潮州餅 | 18 個 |
| 西餅餅卡 | 80 張 |
| 包羅萬有利是 | 1 封 |
| 三牲酒禮金利是 | 1 封 |
| 海味金利是 | 1 封 |
| 大舅利是 | 1 封 |
| 姨仔利是 | 1 封 |
| 龍鳯燭 | 2 對 |
| 男家對聯 | 1 副 |
| 女家對聯 | 1 副 |
| 茶葉 | 2 罐 |
| 禮金盒 | 1 個 |
| (內有扁柏、囍糖、京果、禮金封、紅頭繩及10涼果) | |
| 十涼果 | 2 包 |
| (龍眼乾、荔枝乾、合桃乾、連殼花生、芝麻、紅豆、綠豆、蓮子、百合及紅棗) | |
| 紅頭繩 | 1 扎 |
女家回禮物品
| 禮金回禮利是 | 1 封 |
| 龍鳳餅 | 1 對 |
| 潮州餅 | 8 個 |
| 西餅餅卡 | 8 張 |
| 包羅萬有回禮利是 | 1 封 |
| 三牲酒禮金回禮利是 | 1 封 |
| 海味金回禮利是 | 1 封 |
| 大舅回禮利是 | 1 封 |
| 姨仔回禮利是 | 1 封 |
| 龍鳯燭 | 1 對 |
| 男家對聯 | 1 副 |
| 茶葉 | 1 罐 |
| 十涼果 | 1 包 |
| (龍眼乾、荔枝乾、合桃乾、連殼花生、芝麻、紅豆、綠豆、蓮子、百合及紅棗) | |
| 女婿衣料金利是 | 1 封 |
| 回茶禮利是 | 1 封 |
| (大發一個, 紅包八個, 煎堆八個, 鬆糕八個) | |
呢 個真係超簡單版過大禮呢, 而家仲有涼果同潮州餅未買, 其他都攪掂啦. 但係其實我係度諗, 係咪d回禮利是係咪係男家過大禮去女家時都包埋呢d利是, 只係呢d回禮利是係無放錢, 去到女家時, 女家先放d錢入去回禮利是回返俾男家呢? 同埋我仲係度諗緊究竟d利是應該入幾多錢呢?? 真係要再睇睇先得....
沒有留言:
發佈留言