心目中的結婚公仔

其 實結婚公仔呢個ITEM, 我係上年已經開始搵, 因為初時諗住拎埋去影第一輯Pre-wedding, 點知.... 事源我一直都希望想搵小雲同小寶寶做結婚公仔, 而原來小雲同小寶寶係無出自己既結婚公仔ge. 咁我見其他人會幫隻公仔自己整件婚紗禮服, 我初時都諗住搵到隻公仔之後就試下自己幫佢做衫. 但係原來想搵小寶寶既公仔係好難ga. 因為要搵一隻可以換衫ge, 同埋同小雲差唔多大先得. 本身我上網搵到一對小雲小寶寶塘膠公仔, 好靚好fit去做結婚公仔. 點知原來小寶寶果隻公仔已經絶版, 我搵過好多地方, 都搵唔到... 好努力努力咁搵, 終於知道係日本有得賣呢隻塘膠既小寶寶, 但成$1XXX一隻公仔, 太貴啦, 我真係唔捨得.... 後來我知道小雲小寶寶係有出布絨公仔, 但就唔係著婚紗禮服, 咁我係金都, 百利都有見過有人賣呢款小雲小寶寶公仔, 而佢地自己再做婚紗禮服俾對公仔. 但都賣成超過$500, 我都覺得比較貴, 咁我就去淘寶搵下啦, 我發現淘寶有得賣呢對公仔, 賣RMB1XX, 價錢都可接受, 但要自己整緍紗禮服. 唉... 我又一直都比較懶, 拖到今年年初時終於諗住想去淘寶淘啦, 點知居然賣晒.... 一直都再搵唔到... 而淘寶個店主都話應該唔會返貨... 真係唔開心啦...

我一直都想搵呢對公仔做結婚公仔, 呢張相都係copy一個blog友的, 可惜我都係搵唔到呢, 所以最後放棄左

之 後, 我都有諗過好唔好用其他公仔, 包括大雄靜宜, 大力水手, Little Twins Star, 飄零燕等... 咁大雄靜宜同Little Twins Star既結婚公仔我係淘寶都搵到, 都唔貴ge, 而大力水手都有係淘寶都搵到, 但係就要自己整婚紗禮服. 飄零燕就只係香港先搵到, 都要成差唔多$499. 一直都心大心細ge...

淘寶好多間都有賣大雄靜宜, 價錢都好相宜tim

而Little Twins Star我只係搵到中式ge, 但都好似不錯呢

其實大力水手都幾平ga, 但要自己整婚紗

呢對公仔只可以係香港買到, 大約$499, 其實都幾靚ga

時 間越黎越近, 我都要盡快決定, 早係幾個月前去百利逛逛時, 突然發現到有一間鋪頭賣小雲小寶寶結婚公仔只係賣$240, 我突然叮一聲, 價錢都好平下bor, 跟住當然要發揮下格價精神, 都係無一間平過佢. 真係唔知點解呢間鋪特別平. 所以早幾日決定都係買左先, 費時陣間賣晒. 終於都可以買到小雲小寶寶結婚公仔啦....

呢個就係我最後既結婚公仔啦