日期: 2011年7月2日
今日終於正式展開東京之旅啦~~雖然之前去了幾次日本, 但今次先正式去東京玩(之前去北海道時, 曾經逗留東京一晚), 正正因為咁, 所以沒有太大既感覺.
今早先去築地魚市場食早餐先, 我記得第一次去日本既朝市, 就係函館朝市, 果時真係食到唔捨得走, 個原隻海膽, 而家諗返都回味無窮. 可惜之後一定都食唔返果種味道, 今次黎築地魚市場, 希望可以搵返果種味道啊~~ 我地今日會搭ゆりかもめ無人駕駛列車, 因為酒店既位置差不多係地鐵同ゆりかもめ無人駕駛列車既國際展示場正門駅既中間, 兩邊都係行約7-8分鐘. 基本上今日大部份車程都會搭ゆりかもめ無人駕駛列車, 所以我地買左張一日乗車券, 盛惠800 yen, 一日無限任搭. 我地搭到去新橋駅.
築地魚市場離新橋駅大約15分鐘路程, 但由於我地唔係好識行, 加上又行錯路, 行了差不多半小時先搵到築地魚市場, 這個魚市場都真的很大, 我地行行下見到有原隻海膽賣, 即刻沖過去俾錢買一隻黎試下, 一試之下, 嘩嘩嘩~~~~ 差d想嘔返出黎呀, 勁難食呀, 完全沒有海膽既鮮甜味之外, 仲要有一陣臭魚腥味, 好彩只買左一隻. 我地實在頂唔順, 啱啱見到部汽水機, 即係買返支可樂"浪"下口先. 築地魚市場基本上分開2部份, 一部份就場外市場, 係好似香港既街市咁, 俾人去買魚或者其他海鮮同蔬果, 另一部份就係拍賣場及停車場, 現場所見都很多貨車出出入入. 而停車場隔離還有一些食店. 我地行完場外市場部份, 就行去停車場那邊, 拍賣場一定就入唔到, 加上已經11點幾, 我地行過去食店那部份, 見到"仲家"居然只係得大約10個人係度排隊, 之前上網睇過d資料, 這間"仲家"平時係勁多人排隊的. 我地正係度諗好唔好係度食野. 本身我地諗住一早黎呢度食早餐, 但係我地又晏左出發, 加上又行錯路, 攪攪下, 而家都已經11:30am, 但原先安排左lunch會係另一間庶民米芝蓮食店食, 所以好苦腦應該點決擇. 最後我地都係選擇左米芝蓮食店, hahah, 唯有留待下次有機會再黎啦.
就是這件原隻海膽十分難吃
離開左築地魚市場, 我地搭地鐵由築地駅去日本橋駅, 其實只係一個駅, 唔係好遠, 但我地行到有d累, 所以都係坐地鐵算啦. 今朝都無咩點食到野, 除左食左隻勁難食既海膽外, 所以而家真係好肚餓呀~~ 我地離開左日本橋駅, 立即向住"吉野鮨本店"進發, "吉野鮨本店"離日本橋駅約2-3分鐘, 都容易搵的, 呢間食店被庶民米芝蓮評為3星食店, 即係日本人都話好味既, 緊係要試試.我地叫了兩個壽司set, 每set有10件手握壽司, 再加3件小卷物, 你食食下時, 個壽司師父會無端端即刻整多一件手握壽司送俾你, 好開心ga, hehe, 味道都好好味呀, d食材又新鮮. 我地食到飽飽咁離開, 真不枉我地放棄”仲家”. Hohohoo...
這件壽司是送的
其實呢度同銀座都幾近, 所以順便行過去銀座逛下先, 再順便去埋"花畑牧場"食雪糕. 猶記得當時係函館第一次食"花畑牧場"既牛奶軟雪糕, 一試難忘, 所以今次一定要再食, 但係今次我地試另一様雪糕 - 焦糖雪糕, 唔… 我個人覺得麻麻地, 太甜了, 雖然焦糖本身都好甜, 但味道都一般, 有少少失望啊….
食完雪糕就繼續我地下一個行程啦, 我地首先行返去新橋駅. 無錯, 係行返去, 雖然相距2個地鐵站, 但係都唔係好遠, 一路行一路睇下野, 話咁快又返到黎新橋駅啦. 我地又搭ゆりかもめ無人駕駛列車去青海駅.
由青海駅出閘, 沿接駁天橋行過去就係palette town, palette town分開幾部份, 右邊係Toyota City Showcase, 我地先參觀這裡, 這裡旅行團必去的地方, 所以經常都會見到香港人的. 這裡有最新Toyota汽車展覽, 而場內有2部免費既可以體驗方程式賽車的遊戲機, 我地當然第一時間去試下啦, 好彩都唔係好多人, 排一陣就到. 其實同機鋪既賽車遊戲唔係好大分別. 另外場內設有長1.3km的試車道, 只要有國際車牌, 便可用300 Yen, 在場內繞行2圈. 如果無車牌既朋友, 場內亦有另一條長1.1km的自動駕駛汽車道, 盛惠200 Yen, 便可坐上自動駕駛汽車繞行1圈. 由於我地今次無申請國際車牌, 所以無得試下揸車. 而我地亦本來心思思想試下自動駕駛汽車, 但諗諗下, 因為仲有其他地方要去, 所以都係放棄左.
Toyota City Showcase隔離就係彩虹摩天輪, 之前搭ゆりかもめ無人駕駛列車時已經見到呢個彩虹摩天輪, 而家近睇真係好大個. 仲記得第一次去日本見到摩天輪時, 真係好興奮好想坐, 因為香港無咁大個摩天輪, 但去多幾次日本, 發覺日本周圍都好多摩天輪, 而家睇到無咩感覺, 不過都覺得好靚. palette town 另一部份係室內購物中心Venus Fort, Venus Fort其實係一個outlet, 入到去感覺好似去左澳門威尼斯人, 因為又係採用仿照17世紀歐洲街道的建築, 天花則仿照天空的藍天白雲般, 購物中心多達170間店鋪, 行街就最啱.
行完街之後, 再走去海旁欣賞自由女神像, 夜晚的自由女神像跟彩虹橋真的十分相襯, 之後, 我地再沿海旁行去台場海濱公園. 途中經過見到賣燒墨魚丸, 立即令我想起大阪的燒墨魚丸, 所以買了一盒來食. 坦白講, 真的沒大阪的好味, 但都比香港的好味得多. 休息完一陣再去台場海濱公園的Decks Tokyo Beach, 這是一座購物中心, 當中有最多香港人熟悉既台場小香港, 位於Decks Tokyo Beach 的6-7樓, 其實主要係幾間中式食店組成, 而食店外邊以香港彌敦道作為藍本, 其實應該係話以90年代的彌敦道, 而家既香港已經變左好多, 作為香港人去到台場小香港, 感覺有少少奇怪, 好難形容的感覺, 不過當日所見都唔係好多人係度, 比較冷清. 除了台場小香港外, 還有另一個必去的地方, 就係Muscle Park筋肉擂台, 以前睇電視筋肉擂台, 都已經覺得好得意, 現場見住d人係度玩, 好攪笑呀, 不過同様都唔係好多人係度. Decks Tokyo Beach 其他樓層都係d商店街等等.
富士電視台的夜景都十分美
賣燒墨魚丸的食店, 其實店員不容許影相, 但都已影了. hohoo
筋肉擂台現場
台場小香港, 真係咁似?
我地之後再去Decks Tokyo Beach 對出的海灘, 欣賞彩虹橋及台場夜景. 之後我地要趕返去新橋駅, 因為我地要去"美登利総本店"食晚餐, 這間"美登利総本店"平時係好多人去食, 要排隊等好耐的, 我地都預左要等位, 所以等到最後先黎食, 其實佢last order係21:30, 我地差不多21:15先到, 發現居然無人排隊, 可能就快last order, 所以比較少人, 我地好快就可以有位, 我地一早已經想定要點的食物, 所以好快就有得食啦. 這裡真係一食難忘, 係我地係東京咁多餐最好味既一餐, 我地每人點了一個壽司set, 吞拿魚真的入口即溶, 其他的都十分新鮮美味. 現在回想都十分想再去食. 難怪咁多人都話一定要黎.
食到飽飽之後, 朋友記得在汐留駅附近, 有一座大廈(忘記了大廈名稱)有一個免費瞭望台, 可以從高空觀看附近夜景, 於是我地搭ゆりかもめ無人駕駛列車去汐留駅, 真的有免費瞭望台啊~~ 哈哈...
睇完夜景後, 再搭ゆりかもめ無人駕駛列車返酒店. 今日既一日乗車券真的十分抵用啊~~
p.s. 其實當晚係有世界杯賽事, 所以專登半夜起身去睇, 但我唔到一陣又訓返lu...
-> 繼續 Day 3
-> 繼續 Day 3
