花花世界北海道之旅 - 機票編

終於黎到3月尾, 離出發去北海道既日子, 仲有3個月. 仲記得係2008年5月左右開始計劃這次北海道之旅. 點解咁耐之前就plan定, 其實係因為我之前儲緊Asia Miles去換機票, 而d mileages係2008年6月底就到期, 所以一定要係2008年6月底去換機票, 而睇過咁多種可以換機票的地方, 發覺換日本北海道的機票係最抵. 因為平時去東京或者日本其他地方的機票, 好多時都有promotion. 但係北海道的機票, 都無咩見過有promotion做過, 而平時最平去北海道機票, 都最少要$4xxx. 日本其他地方的機票, 平時都係$2xxx, 咁大家都係用30,000mileages去換機票, 咁緊係換張貴ga la.

不過其實要換去北海道的機票都唔係咁容易. 因為Cathay平時要用錢買去北海道的機票, 都唔係咁容易買得到, 通常都要早幾個月買, 而家更何況係免費換機票. 而且Cathay放出黎可以換的機票都唔係好多張, 而且好多人都會用呢個方法換機票, 所以當一可以換2009年7月的機票時, 我第一時間打去, 當然好難先打得通la, 當我打得通時, 直航去札幌的機票已經換晒la.....不過Asia Miles聽電話個人同我講, 可以再試下遲d再打黎, 因為Cathay可能會再放d機票出黎, 但係就唔知會幾時....唉...果時心諗唔係呀, 一定換唔到la.

咁之後再諗諗下, 不如係其他地方轉機去北海道la, 因為Asia Miles可以先搭Cathay去東京或者日本其他地方, 再轉搭JAL去北海道, 咁樣都係當一個地方, 只係需要用30,000mileages就可以, 期間, 仲可以係轉機既地方停留一次tim. 

最後決定先去左東京先, 第二日再轉飛去北海道. 初時諗住會轉機去札幌, 但係發覺如果我地係札幌走, 會好唔順路. 所以最最最後(因為中間轉過好多次)決定係東京先飛去函館, 而回程時就由旭川返東京再轉飛香港. 

而點解會諗住係7月去北海道, 咁當然係為左睇薰衣草, 其實最好7月中去, 果時d花係開得最靚同最燦爛, 但係由於公司果段時間會開始好忙, 請唔到假, 所以只好7月頭去.

就係咁呢個花花世界北海道之旅就成行la, 跟住落黎就係計劃行程. 其實朋友係呢段時間已經上網搵左好多關於北海道的資料, 同買左幾本旅遊書, 佢未出發已經對當地好熟悉咁, 真係好勁呀, hehe...其實咁仲好, 有人計劃好晒, 唔駛我煩....hoho....好期待啊~~

十分期待

記得係大約半年前, 一日經過地鐵站, 見到有一張海報是關於一套戲劇<<29+1>>的廣告, 是彭秀慧個人作品. 之前已經想看該劇, 但一直都無睇到. 直至見到這個廣告, 突然真的好想去看. 於是就問下朋友雪露, 有無興趣一齊去睇. 她一口答應, 於是我即刻去買飛.

而那次係<<29+1>>第五度 公演, 大家睇完之後, 都覺得有很深的感受, 同埋好有共鳴. 今次雪露同我講, 彭秀慧又有新劇<<再見不再見>>上, 會係黎緊既23-26/4/2009上演, 問我有無興趣去睇, 當然有la, 所以我都走左去買飛.

原來呢套<<再見不再見>>係第三度公演, 之從上次睇完<<29+1>>之後, 已經對彭秀慧有好深刻既印象. 今次真係好期待佢既演出呀~~

<<29+1>>

走進30 是曾經 是再遇 是成長 是 回望

是每個女生 最 勇 敢 的 一 步!

<<再見不再見>>

唯有忘掉自己 才能記不起你

一個讓你笑讓你哭 幫你尋找回憶的故事

Good news!? Bad news!?

今日突然聽到一個消息, 話原先持有我公司股份的母公司, 將所有持有我公司的股份全部賣出. 吓!! 唔係咁大鑊呀!! 又玩呢樣野.

係2年左右, 你地先買左我公司返黎, 而家又賣走左. 玩咩, 咪又要搬野....唉....最重要係而家做緊annual audit, 又咁忙, 都唔知點算好呀....而且又唔知買家係邊個. 你話如果係之前將我地賣走既果間公司買返我地, 就話好啫. 但係又好似唔係bor.

唉...都唔知攪咩. 最後收到消息, 話係賣左俾一個人, 而家既管理層係暫時唔會改變. 咁即係點呀? 都唔知之後, 會唔會再將我公司賣俾其他人, 我好似做左無主弧魂....

唔...其實我一直都好唔滿呢間公司既管理層做事既手法, 所以都預左唔會係度做好耐. 但係而家咁既市道, 出去都幾難搵工la, 而且見工真係好麻煩ga. 唉...呢個消息真係令到我心情幾低落.

I wish

呢 段時間, 公司好忙好忙, 仲要俾d auditor不停咁煩, 突然發覺自己既EQ低左好多....咩唔係人越大, 應該會睇得化d ga咩? 其實我都無咩野心啫, 但求有一份穩定既工, 又唔係想升職 (加人工好過la), 每個月準時出糧, 份人工又夠使就算la. 但係可能自己唔抵得住頸, 見到有問題, 就要做好去....其實應該咁講, 我根本就唔適合做野...haha...

如果可以唔做野, 走去環遊世界幾好呀, 諗起都開心呀. 去一d自己未去過既地方, 見一d自己未見過既野, 咁樣好似做人先有d意義. 咁當然, 真係發夢都無咁早la. 唉...都要面對現實, 唯有早d訓la........

大阪聖誕寒流之旅 - Day 5

2008年12月28日(星期日)

今天係大阪之旅的最後一日, 真係好唔捨得呀, 聽日又要返工. 由於我地係搭中午12點的機. 再加上係印度航空的關係, 所以都係早d去到機場會安全d.

所以今朝要大約9點係酒店出發, 今朝睇下有無野漏左係酒店, 先發覺我地前日係黑門市場買左個布丁同士多啤梨, 唔記得食tim..., 但係我地又趕住check-out, 所以諗住搭車時食. 但係搭地鐵又無得食野, 唯有可能上機先食la. 我地差不多10點到達機場. 因為都幾多人, 所以今次唔可以坐窗口位. 係等上機既期間, 我地食左士多啤梨, 都好好味呀!! 咁我地當然唔放過睇下機場有無野買既機會la. hehe....買完野都差唔多要上機lu. 唉...終於要離開la....

上左機之後, 諗住拎返個布丁出黎食, oh....可能我放係個袋度, 將佢搖黎搖去, 佢個樣變得好醜樣呀, 我怕我食左佢會肚呵呀. 所以最後都係無食度...我真係好想食ga.....返黎既飛機餐同樣都係咁難食la. 食左少少都無再食la. 唔...下次如果再坐印度航空, 真係要自己拎定野食上機呀.

呢個飛機餐最好味就係杯乳酪, 因為係日本制造.

今次大阪之旅, 令我對日本多左d認識, 最攪笑係認識左2個日本人, 雖然大家唔知大家講緊d咩, 但係佢地都好友善. 仲有就係我地發覺日本人, 無論男同女, 佢地影相時都係會"V"字手勢ga, 呢個係佢地既影相指定動作. 唔怪得佢地咁鍾意成龍la, hahah... 

~ 完 ~

大阪聖誕寒流之旅 - Day 4

2008年12月27日(星期六)

來到第四日, 聽日要返香港, 好似過得好快咁....今日我地將會去神戶, 上摩耶山睇日本三大夜景之一的神戶夜景, 同埋會去六甲山牧場. 夜晚就會去Fisherman's Market食buffet.

我地係酒店食完早餐之後, 就搭電鐵去梅田, 再轉搭阪隐電鐵去神戶的三ノ宮站. 由於前幾日去梅田都係睇燈飾, 沒有正式行過街, 所以決定係梅田行吓街先.

去到三ノ宮站都差唔多12點幾, 黎到神戶, 當然要試下呢度最出名既神戶牛柳la, 我地去左三ノ宮站對面既神戶牛ステーキランド, 呢間出左名抵食, 2980yen一個set lunch, 仲有你係睇住個廚師係你面前煮神戶牛柳. 唔....但係我地覺得味道普通, 可能比較平既關係la. 下次都係試下d貴少少, 睇下係咪真係咁好味先.

個廚師會係你面前煮神戶牛柳

食完牛柳之後, 首先我地去左附近既神戶市綜合信息中心(Hello神戶)拎左旅遊指南, 其實係因為指南裡面有coupon, hehe...之後我地就搭巴士上摩耶山既纜車站-摩耶ケーブル下駅. 本身有一架巴士係可以直接去到纜車站門口, 但由於呢架巴士係一個小時得兩班車, 我地怕會錯過搭纜車既時間, 所以搭左另一架2號巴士, 佢係纜車站附近観音寺落車, 落左車之後, 要行大約10分鐘路先到纜車站. 但係呢段路真係....又長又斜, 幾經辛苦行到上去, 終於去到摩耶山既纜車站 - まやビューライン夢散歩, 附近全部都係民居, 估唔到會有一個纜車站係呢個民居裡面. 我地拎左旅遊指南裡面既coupon去買纜車飛. 呢架纜車好得意ga, 為左配合上斜路, 車身都係斜, 成架車都係得我地2個人, 唔知係咪無咩遊客會上去呢個摩耶山呢? 當纜車到達另一個站 - 虹の駅, 我地要落車, 再轉搭另一架吊車上山, 同樣都係得我地2個人, 當吊車去到星の駅, 即係上到山la, 呢個就係摩耶山掬星台, 係我地今晚睇夜景色既地方. 不過而家我地會搭巴士 - 六甲摩耶スカイシャトルバス去六甲山牧場先.

我地就係下面行上黎la, 真係好斜呀!!

中間果架就係纜車

呢條係纜車轉乘吊車必經之路, 夜晚時會燈起所有燈飾, 好靚ga!!

呢架就係係虹の站的吊車

其實呢個六甲山牧場無一本旅遊書有介紹, 只係係網上先搵到資料, 所以初時都無諗住去, 但係上網睇資料時, 發覺六甲山牧場都幾靚咁, 同埋都未去過日本既牧場, 而且又係我地睇夜景既摩耶山附近. 而呢個六甲山牧場都幾出名ga, 係神戶的市立牧場, 尤其佢出產既牛乳產品, 都好受歡迎. 呢個牧場都幾大ga, 同埋有好多不同既動物, 尤其好多綿羊, 真係第一次俾咁多綿羊圍住自己, 佢地會以為你有野食, 係咁追住你ga. 玩完綿羊之後, 我地當然要試下呢度出名既雪糕, 好重奶味, 好濃好滑.

巴士六甲摩耶スカイシャトルバス

離開左六甲山牧場之後, 我地搭返六甲摩耶スカイシャトルバス返到之前上車既地方 - 摩耶山掬星台, 時間只係4點幾, 我地要係度等到夜晚睇夜景, 好彩日本係大約5點幾就會日落, 咁唯有係度等....其實呢度既日景都幾靚, 不過好凍呀....我諗比山下凍左幾度. 我係車站個汽水機買左罐熱飲, 用黎暖下手. 我地係度睇住由日光日白到天都黑齊, 不過因為唔係向住西方, 就睇唔到日落. 原來好多日本人都會上黎呢度影相ga, 越夜越多日本人上黎. 呢個號稱"百萬元美景", 係日本三大夜景之一, 另外兩個係長崎夜景, 同埋函館夜景. 但係我真係好凍, 係凍到唔知點解對腳版好痛, 我見d日本人好勁, 著得好少衫, 都無咩人會著羽絨. 到最後我真係頂唔順, 入左車站保下暖先. 朋友則繼續係出面影夜景.

就快日落既神戶景色

百萬元美景之一 - 神戶夜景

影完夜景之後, 我地搭返まやビューライン夢散歩既吊車同纜車落山, 再轉巴士返三ノ宮站. 係三宮站時, 我地經過一間賣回數卷的金卷店, 諗住問下有無由三宮站去神戶站既JR飛賣, 點知又有bor, 咁我地當然買左la, 之後係三宮站(三ノ宮站)轉乘JR去神戶站, 去我地今晚食飯既地方 - Fisherman's Market. Fisherman's Market位住Mosaic, Mosaic係神戶港臨海複合式商場, 內有多家食肆同店鋪, 而隔離係Mosaic Garden, 有一個50米高既摩天輪, 同埋有不同既遊戲. 而Fisherman's Market係Mosaic2樓, 呢間餐廳主打海鮮自助餐, 2709yen每個人, 都算抵食. 唔...但係我覺得味道普通.

Fisherman's Market的豐富自助餐

夜景-可以見到神戶塔同神戶海洋博物館

已經關左門的煉瓦倉庫

船塢的吊橋遺跡 - はね橋

食到飽飽之後, 就去附近既神戶港欣賞夜景同埋影相. 我地沿住Harbour Walk同埋神戸ガス燈通り行去煉瓦倉庫, 再去到隔離的舊船塢的はね橋影相. 由於我地顧住影相, 差d錯過左返大阪既尾班車, 好彩都趕得切, 如果趕唔切, 真係唔知今晚訓邊呀....
去到大阪梅田站, 又要即刻趕搭尾班電鐵返酒店, 都好彩趕得切....終於完成左第4日旅程, 聽日就返香港la, 真係唔捨得呀!!

參考資料:
神戶觀光網站
神戶市網站