大阪聖誕寒流之旅 - Day 2

2008年12月25日 (星期四)

由於尋日大家都太累, 所以今朝比原定時間晏左起身. 係酒店食完早餐之後, 我地就搭長堀鶴見綠地線去到大正站, 再轉搭JR去Universal City站. 初時諗住9:00am會去到環球片場門口, 最後都要10:30am先到達. 

呢個就係我地既早餐, 都幾豐富ga

去到門口已經見好多人係度買飛, 好彩我地係香港東瀛遊已經買定飛, 我地拎住d飛直接入場, 係出發之前, 我地已經諗好左今日既行程, 首先我地會去玩E.T. Adventure, 我地去到門口時, 已經好多人係度排隊, 門口有個牌寫左我地要等大約20分鐘先有得玩. 咁都無計, 都要排隊, 排到差不多去到門口時, 工作人員問我地叫咩野名, 之後就俾張咭我地, 其實都唔明張咭有咩野用ga, 因為之後臨玩之前, 又俾返佢地. 當我地排過左門口之後, 原來仲要繼續排, 唉...最後真係大約排左20分鐘左右就有得玩la. 其實呢個遊戲係模擬我地係騎著單車, 飛越星際, 應該係模擬電影裡面既情節, 但係因為我地無睇過E.T.呢套戲, 無咩共鳴感, 咁基本上都可以一玩.

呢張就係工作人員俾我地張咭

當我地離開左E.T. Adventure, 就轉戰The Amazing Adventures of Spider-Man-The Ride, 去到門口, 又係好多人呀, 今次要等40分鐘, 唉....都係要等....無無聊聊又過左40分鐘, 終於又有得玩la. 不過首先要戴上立體眼鏡, 這個以Spiderman為題既機動遊戲, 好似動感影院咁, 係模擬你坐係一架車上, 一邊放映Spiderman點樣跟其他壞人對抗, 一邊架"車"就會郁黎郁去, 你會好似感覺到跟Spiderman一齊對抗d壞人咁, 有時你會感覺到東閃西躲, 有時你又會感受到有爆炸等係附近發生, 都真係幾刺激幾好玩, 唔怪得係環球片場最受歡迎的機動遊戲之一, 都真係排咁耐隊都值得.

之後我地再去Back to Future-The Ride, 又係要排40分鐘, 排咁耐隊都係玩得幾分鐘, 這個遊戲係好似"回到未來"電影的橋段, 同樣模擬你坐係架時空船上, 穿梭過去同未來. 當玩完這個機動遊戲之後, 都差不多係食飯時間, 不過我地諗住遲d先食, 因為大部份人都係呢個時候去食飯, 一來餐廳會好多人, 二來我地趁呢段時間, 無咩人排隊玩機動遊戲, 我地就玩左d多人玩既遊戲先.

所以我地去左Jurassic Park, 不過都要等40分鐘, 我地又累又肚餓咁等落去, 真係等了又等, 排了又排呀....當排到差不多時, 我地就拎左係香港買既雨衣出黎, 因為之前已經查過資料, 這個遊戲係有機會濕身. 但係點知一拎件雨衣出黎, 先發覺件雨衣係短袖, 有無攪錯呀, 短袖既雨衣....咁奇怪ge...不過算la, 著左先算la, 呢個遊戲係我地會坐係架船上, 去一個類似熱帶雨林探險, 我地咁啱被分配坐係第一行, 一路都無咩特別, 到最後架船會慢慢升高, 之後突然會由高空衝落水面, 嘩...都幾高ga, 同埋真係會濕身ga, 坐係我地隔離既一對日本男女, 佢地無著雨衣, 就成身濕晒....真係幾刺激, 其實同海洋公園裡既滑浪飛船差不多.  係我地離開時, 仲有得睇返我地係高空衝落水面果刻既相片tim, haha, 睇到自己面容扭曲, 都好攪笑, d相片可以買, 咁當然我地無買la.

我地就係呢個出口度衝落水面

我地玩完Jurassic Park之後, 真係好肚餓, 去左醫肚先....我地選擇左係Jurassic Park對面一間以恐龍做主題既餐廳, 其實都係快餐店一間, 但係食物選擇不是太多,  我地隨意點左2個餐, 但係味道真的麻麻地....我諗係我地大阪之旅最差的一餐. 期間, 我見到好多日本人都拿住一支類似雞脾係度食, 好似好好味咁.... 所以我諗住買一支黎試下, 點知一睇原來係火雞脾同埋要成780yen, 嘩...好貴呀...最後我都係決定唔買la, 慳返d ma...hehe...突然覺得自己好慳家...hoho...

我地食lunch既餐廰

我地既lunch sets

大部份日本人都拿住一支火雞脾

食飽之後, 我地就去玩Jaws大白鯊, 今次大約要排30分鐘左右, 我地會坐係一隻觀光艇上, 經過不同既被鯊魚襲擊既場面, 都幾逼真, 幾好玩. 尤其個觀光艇上的導遊, 雖然佢不停咁用日文介紹, 咁當然我地聽唔明, 但係佢表情十足, 真係幾佩服佢既專業精神.

我地就係會坐係呢隻觀光艇

基本上, 我覺得要玩既遊戲都玩晒, 但係見仲有時間, 所以我地諗住去睇下仲有無其他遊戲, 但有d已經過左播影時間, 最後我地去左Backdraft浴火赤子情, 但係仲多人過之前, 我諗都排左大約45分鐘, 這個以主恐佈大火災為主題, 利用特技攝影技術, 營造高溫等場面, 但係真的一般, 無咩特別.

到我地睇完d火災場面之後, 天色已經轉黑, 四周燈飾已經亮起, 環球片場裡的一棵大型聖誕樹都亮起左燈飾, d燈飾不停咁轉變, 好靚ga, 好多人都係度影相.
我地影完相之後, 就離開環球片場, 返去梅田站食飯. 我地初時諗住去新梅田食道街裡面的一間居酒屋食飯, 點知去到梅田站, 搵左好耐都搵唔到呢條食道街, 我地仲問埋d日本人, 佢地都唔係好清楚, 最後因為我地實在太肚餓, 隨便入左一間迴轉壽司店がんこ, 都幾好味. 食完野之後, 我地就去左新梅田City的空中庭園展望台, 欣賞大阪的夜景, 由於今日係聖誕節, 會延長至12點關門, 所以我地去到新梅田City時, 已經好多人, 連搭電梯都要排隊, 唉...今日成日都不停咁排隊, 排左大約15分鐘先可以搭電梯上去空中庭園展望台, 我地去到35樓, 再轉乘連接兩座大廈的扶手電梯至39樓, 再行上一層, 就係室內的展望台, 而再行上一層至天台, 就係室外的展望台, 原來係日本係好少見可以行出室外的展望台. 我地行到室外果層, 真的可以360度全方位欣賞大阪的夜景, 我地都見到好多日本的情侶都會來到談情的, 不過實在太凍太大風, 感覺好似會俾佢吹郁咁, 睇左一陣, 都係去返室內展望台欣賞夜景.

我地欣賞完夜景之後, 就前去Hep Five睇燈飾, 當我地行去Hep Five期間, 俾我地發現左梅田食道街, 噢...其實好近, 只不過張地圖有少少誤差, 唉...無計la....我地係Hep Five影完相之後, 大家都好累, 搭電鐵返酒店休息lu.

不幸之中的大幸

今日剛起 床時, 剛剛嫂嫂打電話來, 心裡已很奇怪"這麼早?". 聽她聲音好像有些不同, 好像有時發生了. 是真的發生事....正在意大利公幹的我哥, 發生車禍!! 噢!! 真的嚇我一跳....幸好嫂嫂說, 哥哥只是輕傷, 但他的老細就斷了兩條肋骨, 另一同事更嚴重, 需要留院, 而其他同事情況我哥沒有交待得太清楚, 只知道整架車都已經報銷, 可想言之, 當時衝力應該很大.

唉...我掙扎了一段時 間, 好不好跟我媽說這情況. 我怕她擔心, 但又怕她知道我們沒跟她說, 她會更不開心. 最後, 我還是跟我媽說了. 但我發覺我後悔了, 她真的很擔心我哥, 就算我跟她說, 我哥沒怎樣傷, 她還是十分擔心. 看來要我哥再打電話來報平安, 她才可放心....但因為我哥的電話同樣已經報銷, 所以我們沒法聯絡上他, 只好等他再打給我們. 幸好我哥他今晚已打來報平安. 但他老細還要他們繼續做展覽, 說已給了錢, 不可以浪費....噢...他老細也太過份....

現在最重要是我哥他人沒事, 只是胸口撞傷, 沒有繼骨, 只是皮外傷, 真的是不幸中之大幸, 根據我哥的說法, 當地醫院比較落後, 救護車很久才來到接傷者. 我想他返到香港, 都應該檢查一下會好些.

天佑我哥!!

大阪聖誕寒流之旅 - Day 1

2008年12月24日 (星期三)

今日終於出發去大阪啦.......今日要搭6:30am起飛既機, 由於係乘搭印度航空, 出發前已經在網上搵左一d資料, 知道印度航空好多時都會延遲起飛, 更有時是會提早起飛, 所以都唔敢太晏到機場. 但係個問題係....最早去機場既巴士都係3:55am, 去到機場都要5:30am, 都有d怕會唔會太晏, 但都無計, 唯有到時睇下點la.

但係點知...我今日去到巴士站時, 居然架巴士走左....唔係呀....下一班車要好耐之後先有, 哎呀....無理由真係要搭的士去機場ga, 諗諗下架巴士係將軍澳都會兜半個小時, 仲要呢架通宵巴士係會行埋藍田, 所以即刻搭的士去藍田mtr追架巴士, 諗住一定ok la. 當我去到藍田mtr下面既類似巴士總站既地方時, 先發覺原來架巴士站係係對面條馬路, 唔會經過呢個巴士總站. 唉...我唯有搵路行過對面la, 平時日頭時我係會經過藍田mtr過去對面, 但係點知當我一個人拖住個喼去到藍田mtr時, 發覺佢係拉晒閘, 無得過去...吓...咁點算好呀!! 我四周又無人又黑, 我真係都唔知可以點行過去對面呀, 又擔心會miss左班巴士bor....唉....最後我決定搭的士去觀塘算吧la, 好彩果度有的士係度, 如果唔係我真係唔知係邊度搵的士呀...唉...真係無聊, 早知一早就搭去觀塘算la...

終於係觀塘上左巴士, 原來夜晚都好多人搭ga, 我都差d無位坐呀. 去到機場都差不多5:30am, 即刻走去check-in, 居然架機早10分鐘起飛, 即係6:20am起飛. 真係奇怪. 但係當我地差不多6點去到閘口時, 佢居然未上得機, 明明boarding pass叫我5:45am登機ga ma, 咁我地就坐係度等下, 我地見到架機停左係度, 原來佢仲卸緊d行李. 唔係呀...又話會早d飛ge...點解而家仲卸緊行李ga. 到差唔多6:20am, d空姐仲未有意慾俾我地上機, 咁我地走去問下佢地, 係咪會delay呀, 空姐話應該會有少少delay, 唔....希望真係少少la, 因為我係網上睇過一d資料, 話印度航空成日都會delay, 而且delay都幾個小時ga....好彩真係delay左少少, 我地6:45am就上到機. o....終於放心la.

我地就係坐呢架飛機la

其實架機都幾殘舊, 初時都怕會唔會有d亞差味, 不過都無bor, 都乾淨ge. 架機未起飛我已經訓著左la, hehe...因為"尋晚"真係無咩點訓過呀. 當去到關西空港時, 已經係當地時間11:30am左右, 過埋關都12:00pm la, 不過今次過關好快呀, 反而係等行李比較耐.

呢個飛機餐真係幾難食

之後我地就即刻去南海電鐵買海遊館南海版一日票, 因為今日既行程係首先去Rinku Premium Outlet先, 之後返酒店check-in放低行李, 跟住即刻飛奔去海遊館參館, 夜晚去睇燈飾. 當我地買完一日票之後, 就直奔去outlet, Rinku Premium Outlet 係南海本線りんくうタウン站出行大約5-6分鐘左右, 係電鐵站會有指示去outlet既方向, 我地初時擔心會買到唔知時間走, 因為只係預左3小時係outlet行同埋仲要食埋lunch. 但係行完outlet之後, 我係一件野都無買到....因為d yen實在太貴, 而且啱啱香港好多商店都大減價, 變左個價錢同香港唔係相差太遠, 唉....居然係呢個堪稱大阪最强的outlet, 居然買唔到野, 真係有d失望....算la....食完lunch之後, 我地就搭南海電鐵返酒店check-in先.

係outlet隔離有一個好大既摩天輪, 可惜我地無時間玩

呢個就係我地既lunch, 都幾好味ga, 兩個定食合共1900yen

 

海遊館南海版一日票

但係我地由於無留意時間, 竟然錯過左急行既電鐵, 其實我地只係遲左2分鐘, 咁下一班車係要太約5分鐘後到, 但係呢架只係普通電鐵, 係會停每個站, 估計要搭一個多小時先會到, 我地諗左一陣都係上左車先算, 諗諗下, 我地決定係下一個站出, 因為下個站係泉佐野站. 呢個站係一個轉車站, 有好多車都會經過, 所以我地諗住係呢度轉另一架急行既電鐵. 期間, 有一個香港人見我地係泉佐野落車, 就走黎問我地去難波站, 係咪要轉車先去到, 我地同佢講話轉搭另一架電鐵會快太約半個小時到達. 之後, 那個香港人即刻返轉頭, 原來係叫埋佢其他既朋友一齊去轉車. 都幾攪笑ga...
我地去到天下茶館站再轉堺筋線去長堀橋站, 好多人都會去到難波站先轉另一條線, 但係我地覺得係難波站轉車, 都要行好遠, 應該同係中環站轉香港站差不多遠. 但係天下茶館就近好多, 就好似九龍塘地鐵轉九龍塘火車站咁. 加上我地又拖住行李, 如果要行咁遠都幾麻煩.
我地住既酒店 - 心齋橋芝莎酒店原來真係好近長堀橋站, 大約行3分鐘就到. 我地去度酒店放低行李, 就要再出發去下一個行程 - 海遊館. 海遊館係全世界最大既室內水族館. 係中央線大阪港站行大約6-7分鐘. 由於海遊館係聖誕期間會有大型燈飾, 所以係大阪港站時, 已經有好多日本人. 去到門口, d燈飾都真係幾大型同幾靚. 海游館雖然真係幾大, 但又唔係真係有咩咁特別, 我地參觀完海遊館同埋係門口影完相之後, 就返去難波附近食飯. 本身我地諗住去自由軒食咖喱, 但係又突然想食壽司, 所以去左魚心, 佢有間分店係法善寺橫丁, 係日本橋站同難波站中間, 所以我地係日本橋站落車行過去.

 

 

 

海遊館既燈飾係我地呢幾日睇既燈飾最大型既

 

 

去到日本橋站時, 經過有間藥房, 係做緊大減價, 第一時間緊係衝左入去先, d野又真係幾平, 但係又諗住之後幾日都會經過日本橋站, 所以唔急於係今日買, 所以都係空手出返黎. 我地沿進地圖直接去到魚心, 入到去就即刻俾張10% discount coupon佢地, 張coupon係香港時已經print定出黎, 但係一睇到d價錢, 原來都唔平ga, 每一碟壽司都幾貴, 要600-700yen以上, 雖然真係好大件....我地係度諗緊食咩之際, d服務員走黎同我地講左一大堆日文, 可能佢地見我地個樣好迷惘, 我同佢地講我地唔識日文, 之後就有另一個服務員走黎同我地講國語, haha...真係估佢唔到.

d壽司真係幾大件, 都幾好味, 不過真係比較貴左d

三文魚頭湯, 都幾好味

食飽之後, 我地就行過去難波方向, 由於今晚係平安夜, 所以仲會有好多燈飾睇, 我地就決定行去難波Parks睇燈飾, 係出發之前, 已經搵過一d資料, 知道邊度有燈飾睇, 當行到難波Parks時, 發覺所謂既燈飾, 只係一棵聖誕樹, 唔...聖誕樹都幾靚, 只不過無咩特別. 可惜當時d商店都關門無得行街. 之後我地再去心齋橋Big Step, 唔.....真係只係得一個類似聖誕樹既燈飾.....咁影完相之後就走la...

     難波Parks既聖誕樹燈飾, 都幾靚        

 

            Big Step 既聖誕樹燈飾           

其實我地酒店係長堀橋站同心齋橋站好近, 而中間係有一條Crysta地下街相連, 我地決定經過呢條地下街返酒店, 可惜好多商鋪都關門, 完全無野睇. 不過算la, 今日都行左好多路, 都已經很累, 都是早d返酒店休息, 聽日又要一早起身去環球片場.

參考資料:
關西旅遊指南
日本旅遊觀光綜合資訊網
日本國際觀光振興機構
關西國際機場旅遊景點介紹